PAULUS PAPA V.

Ad perpetuam rei memoriam.

Cum certas Archiconfraternitati Conceptionis Beatæ Mariæ in Ecclesia Sancti Laurentij in Damaso de Urbe canonicè instututæ, Indulgentias, & gratias spirituales, quibus in posterum fruitur, duxerimus præscribendas.

Idcircò de Omnipotentis Dei misericordia, ac Beatorum Petri, & Pauli Apostolorum eius auctoritate confisi, omnes, & singulas Indulgentias, peccatorum remissiones, ac pœnitentiarum relaxationes eidem Archiconfraternitati, & illius Confratribus, & Consororibus per quoscumq;[ue] Romanos Pontifices Prædecessores nostros hactenùs concessas revocantes, & annullantes, ac nullius roboris, & momenti posthac à data præsentium fore declarantes:

Omnibus, & singulis utriusq;[ue] sexus Christifidelibus, qui dictam Achiconfraternitatem de cætero ingredientur, die primo eorum ingressus, si verè pœnitentes, & confessi Sanctissimum Eucharistiæ Sacramentum sumpserint, Plenariam: Ac tàm ipsis nunc, & pro tempore describendis, quàm iam descriptis IESU, & Beatissimæ Virginis MARIÆ, ore, si potuerint, sin autem corde devotè invocaverint, etiam Plenariam: Necnon eisdem Confratribus, & Consororibus, qui pœnitentes, & confessi in Conceptionis Beatæ Mariæ festivitate, Sanctissimum Eucharistiæ Sacramentum sumpserint, & pro Christianorum Principum concordia, hæresum extirpatione, ac Sanctæ Matris Ecclesiæ exaltatione pias ad Deum preces effuderint, quo die festivitatis huiusmodi id egerint, Plenariam similiter omnium peccatorum suorum Indulgentiam, & remissionem misericorditer in Domino concedimus; Insuper eiusdem Contratribus, & Consororibus similiter pœnitentibus, & confessis, qui in Nativitatis, Annunciationis, Purificationis, & Assumptionis eiusdem Mariæ festis diebus dictum Sanctissimum Sacramentum sumpserint, & oraverint, ut præfertur, quo die prædictorum id egerint, septem annos, & totidem quadragenas; Ijs verò, qui Processioni per dictam Archiconfraternitatem in die Festo Conceptionis eiusdem Beatæ Mariæ singulis annis fieri solitæ, in quo Puellas matrimonio collocare consuevit, interfuerint, tres Annos, & totidem quadragenas; Necnon qui Congregationibus tàm publicis, quàm privatis eiusdem Archiconfraternitatis, ubi ipsius negocia tractantur, pariter interfuerint centum dies pro qualibet vice.

Præterea tàm eisdem Confratribus, & Consororibus, quàm alijs utriusq;[ue] sexus Christifidelibus, qui singulis diebus festis, vigilijs, & Sabathis eiusdem Beatæ Mariæ totius anni in Capella Conceptionis eiusdem Beatæ Mariæ sita in prædicta Ecclesia, interfuerint, & ibi Litanias, & Antiphonam Salve Regia audiverint, aut illas recitaverint, quoties id fecerint, ducentum dies. Necnon eisdem Confratribus, & Consororibus tantùm, qui Corpora Defunctorum Confratrum, & Consororum dictæ Archiconfraternitatis ad Sepulturam Ecclesiasticam comitati fuerint, & pro ipsius defuncti anima preces Deo effuderint, ducentos dies pro qualibet vice.

Quoties verò conscientiæ duæ vesperè examen egerint, & protectioni eiusdem Beatissimæ Virginis Mariæ, & Angeli Custodis sese commendaverint, toties centum dies; Ijs verò, qui in honorem eiusdem Immaculatæ Virginis Mariæ pauperibus Puellis, ne in Diaboli potestatem veniant, subvenerint, & auxilium præstiterint, aut quovis modo earundem pudicitiæ conservandæ occasionem præbuerint, quotiescumq;[ue] hæc egerint, annum unum.

Qui verò paci, & unioni inter fideles constituendæ operam dederint, aut peccatum reliquerint, aut Hospitalia, & Carceratos visitaverint, & ignorantes doctrinam christianam docuerint, sexaginta dies pro qualibet vice; Ijs verò, qui Officium B. Mariæ Virg.[inis] devotè recitaverint, quinquaginta dies pro qualibet vice; & qui quotidie dictum Officium per mensem continuum similiter recitaverint, si confessi, & sacra Communione refecti fuerint, septem annos, & totidem quadragenas semel pro quolibet mense de iniunctis eis, seu aliàs quomodolibet debitis pœnitentijs in forma Ecclesiæ consueta relaxamus.

Prætereà eidem Archiconfraternitati, ac Illius nunc, & pro tempore existentibus officialibus, ut omnes, & singulas supradictas Indulgentias, & gratias spirituales alijs Confraternitatibus sub Invocatione Conceptionis eiusdem Beatæ Mariæ nunc erectis, & in posterum canonicè erigendis ubiq;[ue] locorum existentibus, servata tamen forma præscripta in constitutione fel.[icis] rec.[ordationis] Clementis Papæ VIII. Prædecessoris nostri, communicate liberè, & licitè possint, & valeant, auctoritate Apostolica tenore præsentium facultatem concedimus, & impartimur.

Non obstañ constitutionibus, & ordinationibus Apostolicis, cæterisq;[ue] contrarijs quibuscumque. Præsentibus perpetuis futuris temporibus duraturis.

Dat. Romæ apud Sanctum Marcum sub Annulo Piscatopris die V. Iulij M.DCVII. Pontificatus Nostri Anno Tertio.

CLEMENS PAPA VIII.

Ad perpetuam rei memoriam;

Quæcumq;[ue] à Sede Apostolica ad promovendam Christifidelium salutem aliquando concessa sunt, & si ea maturo consilio, magnaq;[ue] prudentia, & cautione sancita, & decreta sint, tamen cum Romanus Pontifex de animarum salute solicitus progresso temporis animadvertit sensim aliquos in eisdem statutis, & decretis observandis provenire; debet pro sui Pastoralis officij munere illis opportuna ratione occurrere, & quantum cum Domino potest, adhibito salutari remedio providere.

Cum itaq;[ue] à pluribus Romanis Pontificibus Prædecessoribus nostris, & forsan etiam à Nobis nonnullis Regularibus Ordinibus, Religionibus, & Institutis, ac etiam Christifidelium sæcularium Archiconfraternitatibus, & Congregationibus diversarum Nationum, nominum, & institutorum, tam in Alma Urbe nostra, quam in alijs Civitatibus, & locis Christiani Orbis institutis facultas erigendi, & instituendi in eorum, & alijs Ecclesijs, & Collegijs, necnon etiam sibi aggregandi Confraternitates, & Congregationes in eadem Urbe, & in alijs locis existentes, eisq;[ue] privilegia, indulgentias, facultates, aliasq;[ue] spirituales gratias, & indulta sibi concessa respectivè communicandi attributa fuerit, ac nulla certa forma, vel ratio præscripta sit, quæ in huiusmodi erectionibus, institutionibus, aggregationibus, & communicationibus faciendis servati debeat, propterea sive negligentia Superiorum Ordinum, Religionum, & Institutorum, vel Officialium Archiconfraternitatum, & Congregationum erigentium, instituentium, aggregantium, & communicantium, quæ Confraternitatibus, Congregationibus erigendis, instituendis, & aggregandis, & quibus communicationem Privilegiorum, Indulgentiarum, aliarumq;[ue] gratiarum prædictarum fiunt non servant formam in huiusmodi erectionibus, institutionibus, aggregationibus, & communicationibus servari debitam, neq;[ue] præscribant modum, quo Privilegia, Indulgentias, Facultates, aliasq;[ue] spirituales gratias, & indulta prædicta consequi debeant; seu ipsarum Confraternitatum, & Congregationum incuria, quae non inquirunt ea, quæ præstare oportet, ut illa consequantur, nonnulle praut consuetudines irrepserunt, multaq;[ue] incommoda inde provenerunt.

Quibus Nos pro commisso Nobis Apostolicæ sollecitudinis officio, paternaq;[ue] erga omnes Christifideles charitate prospicere volentes, hac nostra Constitutione perpetuo valitura decernimus, atq;[ue] statuimus, ut in posterum tam huius Almæ Urbis nostræ, quàm aliarum Civitatum, & locorum totius Christiani Orbis Regularium, Ordinum, & Religionum, & Institutorum, quibus in eorum, & quibuscumq;[ue] alijs Ecclesijs, & Collegijs Confraternitates sæcularium erigendi, & instituendi facultas concessa est, necnon etiam Archiconfraternitatum, & Congregationum cuiusvis Nationis, nominis, & instituti illæ sint, & in quibuscumq;[ue] Ecclesijs, Domibus, & Oratorijs, tam sæcularium, quàm ut præfertur quorumcumq;[ue] etiam Mendicantium, Ordinum, Religionum, & Institutorum Regularium, quavis tam ordinaria, quàm Apostolica auctoritate erectæ, ac institutæ, existant, seu alias quovis modo introductæ reperiantur, quibus alias Confraternitates, & Congregationes instituendi, erigendi, ac sibi aggregandi, illisq;[ue] privilegia, indulgentias, facultates, aliasq;[ue] spirituales gratias, & indulta prædicta elargiendi, & communicandi potestas à Ro:[manis] Pontificibus Prædecessoribus nostris, vel à Nobis, & Apostolica Sede attributa fuit, Magistri, Priores, Præpositi, Gubernatores, Præceptores, Primicerii, Prælati, Custodes, Guardiani, Præfecti, Administratores, & alij Officiales, seu Superiores quovis modo nuncupati, Regularium siquidem Ordinum, Religionum, & Institutorum unam tantum Confraternitatem, & Congregationem de consensu tamen Ordinarij loci, & cum literis eius testimonialibus, quibus Confraternitatis, & Congregationis erigendæ, & instituendæ pietas, & christianæ charitatis officia, quæ exercere cupit, apud eos commendentur, in eorum, & quibuscumq;[ue] alijs Ecclesijs, & Collegijs erigere, & instituere.

Cæterarum verò Archiconfraternitatum, & Congregationum in singulis Civitatibus, Oppidis,vel locis unam etiam Confraternitatem, & Congregationem dũtaxat, quæ Apostolica, vel ordinaria auctoritate prius erecta, ac nulli alteri Ordini, Religioni, Instituto, Archiconfraternitati, & Congregationi eiusdem, vel alterius Nationis, nominis, & instituti aggregata sit, prævio similiter loci Ordinarij consensu, & cum eius litteris testimonialibus, quibus eiusdem Confraternitatis, & Congregationis aggregandæ institutum, pietas, & Christianæ charitatis officia, quæ exercere consuevit apud eos commendentur, sibi adiungere, & aggregare possint.

Huic verò Confraternitati, & Congregationi erigendæ, instituendæ, seu aggregandæ ea tantum Privilegia, Indulgentias, facultates, aliasq;[ue] spirituales gratias, indulta, quæ ipsi Ordini, Religioni, Instituto erigenti, instituenti, ac communicanti, seu Archiconfraternitati, & Congregationi aggreganti nominatim, & in specie, non autem quæ per extensionẽ, vel communicationem sibi quovis modo concessa sunt, & illa quidem non sub generali forma verborum, vel ad instar, sed expressè, & in specie communicare valeant.

Statuta autem pro regimine Ordinum, Religionum, & Institutorum erigentium, & instituentium, ac communicantium, seu Archiconfraternitatum, & Congregationum aggregantium edita, Confraternitatibus, & Congregationibus erigendis, instituendis, & aggregandis, & quibus communicationes Privilegiorum, & aliorum prædictorum fiunt impartiri non possint, nisi ea prius ab Episcopo Diocesano examinata, & pro ratione loci approbata fuerint, quæ nihilominus eiusdem Episcopi decretis, ac moderationi, & correctioni in omnibus, & semper subiecta remaneant.

Insuper volumus, & ordinamus, ut prædicti Ordines, Religiones, Instituta erigentia, instituentia, & communicantia, necnon Archiconfraternitates, & Congregationes aggregantes certam erigendi, instituendi, aggregandi, & communicandi formulam à Nobis novissimè approbatam diligenter observent, secundum quam Privilegia, Indulgentias, facultates, aliasq;[ue] spirituales gratias, & indulta ipsis Ordinibus, Religionibus, Institutis erigentibus, instituentibus, & communicantibus, seu Archiconfraternitatibus, & Congregationibus aggregantibus nominatim, & expressè, non autem per communicationem, neq;[ue] ad instar, ut supra concessa ipsis Confraternitatibus, & Congregationibus erigendis, instituendis, & aggregandis, & quibus communicationes fiunt communicare possint.

Quibus Cõfraternitates, & Congregationes eiusdem dumtaxat Nationis, & nominis, Ordinis, Religionis, & Instituti, Archiconfraternitatis, & Congregationis cui aggregantur, tam hactenus aggregatæ, quàm in posterum aggregandæ utantur, potiantur, gaudeant, ita ut dictarum Confraternitatum, & Congregationum erectarum, institutarum, & aggregatarum, ac quibus communicationes factæ sunt, Ministri, Officiales, & alij supradicti, privilegia, indulgentias, facultates, aliasq;[ue] spirituales gratias, & indulta huiusmodi, prævia tamen recognitione Ordinarij loci, qui adhibitis duobus de eiusdem Ecclesiæ Capitulo illa, iuxtà Sacri Concilij Tridentini decretum promulganda decernat, debitis temporibus promulgare valeant.

Quibus etiam Ministris, Officialibus, & alijs prædictis eleemosynas, & alia oblata Christianæ charitatis subsidia, iuxta modum, & formam per Ordinarium loci præscribendam, remotis tamen mensis, pelvibus, capsis, quæ in Ecclesijs, & Oratorijs dictarum Confraternitatum, & Congregationum publicè ad hoc exponi consueverunt, excipiendis potestas detur. Atq;[ue] hoc ipsum Ordines, Religiones, Instituta erigentia, instituentia, ac communicantia, seu Archiconfraternitates, & Congregationes aggregantes tam Almæ Urbis nostræ, quàm Aliarũ Civitatum, & locorum quorumcunq;[ue] iuxtà modum à Vicario Urbis, & ab Ordinarijs locorum respectivè præscribendum observare teneantur.
Eleemosynas autem sic collectas in reparationem, & ornatum Ecclesiarum, tam Ordinum, Religionum, Institutorum erigentium, instituentium, & communicantium, ac Archiconfraternitatum, & Congregationum aggregantium, quàm Confraternitatum, & Congregationum erigendarum, instituendarum, & aggregandarum, & quibus communicationes fient, aut in alios earum pios usus arbitrio eiusdem Vicarij nostri in Urbe, necnon Ordinariorum locorum respectivè fideliter exponere, atq;[ue] erogare procurẽt, ut omnes intelligant cœlestes Ecclesiæ thesauros, nõ quæstus, aut alicuius lucri causa, sed pietatis, & charitatis excitandæ gratia ex Apostolicæ Sedis benignate Christifidelibus aperiri.

Præterea volumus, ut Confessarij, qui vigore privilegiorum ipsis Ordinibus, Religionibus, Institutis erigentibus, instituentibus, & communicantibus, seu Archiconfraternitatibus, & Congregationibus aggregantibus concessorum, ac Confraternitatibus, & Congregationibus aggregandis communicandorum pro tempore eligi possunt, & poterunt, sæculares scilicet in Alma Urbe à prædicto nostro Vicario, extra Urbem verò à locorum Ordinarijs, Regulares autem non solum à prædicto Vicario nostro, & à locorum Ordinarijs respectivè, sed etiam à suis Superioribus approbati sint, utque Confratres confitentes à criminibus, casibus, & censuris, iuxtà dictorum privilegiorum (quatenus tamen sint in usu, & Sacris Concilij Tridentini decretis, ac Ro:[manorum] Pontificum Prædecessorum nostrorum, & nostris Constitutionibus non adversentur, nec revocata, aut sub aliquibus revocationibus comprehensa sint) formam, & tenorem dumtaxat absolvere valeant.
Decernimus insuper, ut iidem Confessaris prædictos Confratres cuiuscumq;[ue] gradus, status, conditionis, ac præminentiæ, etiamsi speciali nota dignæ fuerint, à casibus contentis in literis, quæ die Cœnæ Domini legi consueverunt, necnon violationis immunitatis, & libertatis Ecclesiasticæ, & clausuræ Monasteriorum Monialium, si videlicet sine necessaria, & urgenti causa, ac sine Superiorum licentia, vel etiam si causa, & licentia concessa abutentes prædicta Monasteria ingressi fuerint, necnon violentæ manus injectionis in Clericum, & singularis certaminis, seu duelli, ac ab alijs etiam casibus tam à Nobis, quàm à prædicto nostro in Urbe Vicario, & loculorum Ordinarijs respectivè reservatis, & pro tempore reservandis, & etiam à quavis excommunicatione ab homine lata absolvere, & super irregularitatibus, tam ex aliquo defectu provenientibus, quàm occasione delicti contractis, cum aliquo dispensare, prætextu dictorum privilegiorum nullo modo possint.

Demùm statuimus, & pariter ordinamus, ut Confratres & Congregationes ubivis locorum, quavis auctoritate, ut præfertur, erectæ, & institute, & quibus communicationes prædictæ factæ sunt, ac cuicunq;[ue] ex dictis Ordinibus, Religionibus, Institutis, Archiconfraternitatibus, & Congregationibus ubilibet existentibus hactenus aggregatæ, ab eisdem respectivè Ordinibus, Religionibus, Institutis, Archiconfraternitatibus, & Congregationibus novas erectionum, Institutionum, Communicationum, & Aggregationum literas, iuxtà formam à Nobis novissimè approbatam, infra annum, si in Europa sint, et si extra Europam fuerint, infra biennium à die publicationis præsentium in Romana Curia faciendæ computandos impetrate teneantur, alioquin dicto tempore elapso, erectiones, institutiones, & quæcumque communicationes privilegiorum, facultatum, indulgentiarum, aliarumque spiritualium gratiarum, & indultorum, & aggregationes illarum vigore ipsis concessæ, nullius sint roboris, & momenti, ac revocatæ, & abolitæ censeantur eo ipso.

Erectionum autem Institutionum, Communicationum, & Aggregationum, tam hactenus factarum, quàm deinceps faciendarum literæ, ab ipsis Ordinibus, Religionibus, Institutis, seu Archiconfraternitatibus, & Congregationibus gratis omninò, ac nulla prorsus mercede, etiam à spontè dantibus accepta, expediri, & concedi debeant.

Quod si Ministri aliqui, Superiores, vel Officiales quocũq;[ue] nomine nuncupati, Ordinum, Religionum, Institutorum, seu Archiconfraternitatum, Congregationum, & Confraternitatum hujusmodi, quavis auctoritate, vel privilegio & officio fugantur, & præfulgeant contra præmissa in aliquo venire vel facere præsumpserint, Erectiones, Institutiones, & Communicationes privilegiorum, Indulgentiarum, facultatum, spiritualimq;[ue] gratiarum, & indultorum, aliorumq;[ue] præmissorum concessiones, necnon aggregationes per ipsos faciendæ, seu renovandæ, nullius sint roboris & momenti, & quilibet eorũdem Ministrorum, Superiorum, Officialium, & aliorum prædictorum privationis officiorum, quæ obtinet, ac inhabilitatis ad illa & alia in posterum obtinenda pœnam, quæ al alio quàm à Nobis, vel à Romano Pontifice pro tempore existente remitti non possit, incurrat eo ipso.

Decernentes præsentes literas perpetuò validas & efficaces existere, & fore, ac ab omnibus, & singulis, ad quos spectat, inviolabiliter observari debere, sicq;[ue] nostræ mentis & intentionis existere, & ita & non aliter per quoscumq;[ue] Iudices ordinarios & delegatos, etiam Causarum Palatii Apostolici Auditores, ac S.[anctæ] R.[omanæ] E.[cclesiæ] Cardinales, etiam de Latere Legatos, sublata eis, & eorum cuilibet quavis aliter judicandi, & interpretandi facultate, & auctoritate iudicari, & definiri debere, ac irritum & inane quicquid secus super his à quoquam, quavis auctoritate, scienter, vel ignoranter contigerit attentari.

Non obstantibus quibusvis constitutionibus & ordinationibus Apostolicis, ac quorumcumque Ordinum, Religionum, & Institutorum, seu Archiconfraternitatum, Congregationum, & Confraternitatum sæcularium, etiam juramento, confirmatione Apostolica, vel quavis firmate alia roboratis statutis, & consuetudinibus, privilegiis quoq;[ue], indultis, & literis Apostolicis, etiam Mare magnum, ac Bulla aurea nuncupatis, Regularibus Ordinibus, Religionibus, Institutis, seu Archiconfraternitatibus, Congregationibus, & Confraternitatibus sæcularium, eorumq;[ue] Superioribus, & aliis quibusvis personis, cuiuscumq;[ue] status, gradus, ordinis, conditionis, dignitatis, & præminentiæ existentibus, sub quibuscumq;[ue] verborum formis, & tenoribus, ac derogatoriarum derogatoriis, alijsq;[ue] efficacioribus, & insolitis clausulis, necnon irritantibus & aliis decretis in genere, vel in specie, etiam Motu proprio, & Consistorialiter, & alias quomodolibet in contrarium præmissorum, etiam pluries concessis, approbatis & innovatis.
Quibus omnibus, & singulis, etiamsi pro illorum sufficienti derogatione de illis, eorumq;[ue] totis tenoribus specialis, specifica, expressa, & individua, non autem per clausulas generales idem importantes mentio, seu quævis alia expressio habenda, aut aliqua alia exquisita forma ad hoc servanda foret illorum tenores, ac si ad verbum exprimerentur, & insererentur, præsentibus pro plenè & sufficienter expressis, & infertis habentes, illis aliàs in suo robore permansuris, hac vice dumtaxat harum serie specialiter, & expressè derogamus, ceterisq;[ue] contrariis quibuscumq;[ue].

Ut autem præsentes literæ ad omnium quos concernunt, notitiam faciliùs deveniant, volumus illas ad valvas Basilicarum S.[ancti] Jo.[annis] Lateranen.[sis], & Principis Apostolorum de Urbe, & in acie Campi Floræ more solito publicari, & affigi, atq;[ue] iis inde amotis, earumdem exempla etiam impressa ibi affixa relinqui, factaq;[ue] publicatione hujusmodi, omnes Regulares Ordines, Religiones, Instituta, & Archiconfraternitates, Congregationes, & Confraternitates sæcularium, quæ in Urbe quidem post mensem, quæ verò in Europa, post decem menses, quæ demùm extra Europam fuerint, post octodecim menses à die publicationis hijusmodi computandos, perinde afficere, & arctare, ac si earum cuilibet nominatim insinuatæ fuissent.

Et nihilominus, ut ipsæ præsentes literæ notiares fiant, magisq;[ue] omnibus innotescant, universis & singulis venerabilibus fratribus Patriarchis, Primatibus, Archiepiscopis, Episcopis, & aliis locorum Ordinariis per easdem præsentes committimus & mandamus, ut per se vel alium, seu alios hasce nostras literas, postquam earum exemplum receperint, seu earum notitiam habuerint, semel aut pluries, prout eis magis expedire visum fuerit, in suis Cathedralibus, & majoribus respectivè Ecclesiis, Civitatum, Oppidorum, & locorum quorumcumq;[ue] eorum Diœcesum, dum in eas major populi multitudo ad divina convenerit, solemniter publicent, & publicari auctoritate nostra mandent ac faciant.

Ceterum quia difficile foret easdem præsentes ad singula loca, ubi opus esset, deferri, volumus, & simili auctoritate decernimus, ut earum transumptis, etiam impressis, manu alicuius Notarii publici subscriptis, & sigillo alicuius personæ in dignitate Ecclesiastica constitutæ munitis eadem ubique fides habeatur, quæ ipsismet Literis haberetur, si essent exhibitæ, vel ostensæ.

Dat.[um] Romæ apud S. Petrum, sub annulo Piscatoria, die 7. Decembris M.DCIIII. Potificatus Nostri Anno Tertiodecimo.