In nomine Patris et Filii et Spiritus Sancti. Amen. etc.

Nos Fridericus, Dei gratia, Romanorum Imperator et semper Augustus et Henricus Rex, filius noster, interventu venerabilis Patris nostri Alexandri, Dei gratia Summi Pontificis et Fratruum suorum Cardinalium, pro parte nostra et hæredum nostrorum paciscimur vobiscum, Domine Willelme, eadem gratia Illustris Rex Siciliæ quod amodo usque ad quindecim annos observabimus vobis et hæredibus vestris et universo Regno vestro et toti terræ dominationis vestræ veram et firmam pacem.
Et quod per nos, vel quoslibet alios, mari vel terra, vos prædictum illustrem Regem et hæredes vestros, aut Regnum vestrum et terram dominationis vestræ, sicut præscriptum et determinatum est, usque ad quindecim annos non invademus, nec invadi faciemus, nec vobis, aut Regno vestro et iam dictæ terræ dominationis vestræ guerram aliquo modo faciemus.
Et ut hæc omnia suprascripta firmiter et illibata a nobis suprascripto Friderico, Dei gratia, Romanorum Imperatore et semper Augusto et Henrico filio nostro Rege et hæredibus nostris, tam vobis supradicto illustri Regi Willelmo, quam hæredibus vestris et Regno vostro et toti terræ dominationis vestræ attendantur et observentur: nos prædictus Imperator bona fide, sine fraude et malo ingenio in præsentia Beatissimi Patris nostri Papæ Alexandri et Cardinalium et Legatorum vestrorum, Romualdi venerabilis Salernitani archiepiscopi et ROGERII egregi Comitis Andriæ, et Principum ac fidelium nostrorum a Comite Henrico de Diessa in anima nostra super sancta Dei Evangelia et Sanctorum Reliquia iurare fecimus et Henricum filium nostrum per interpositam dignam personam in anima sua id ipsum iurare faciemus usque ad medium futurum septembrem Indictionis XI. Et Principes nostros idem iurare fecimus, videlicet Moguntinum Archiepiscopum, Arnoldum Trevirensem Archiepiscopum, Conradum Vormatiensem Electum, Gotifredum Imperialis aulæ Cancellarium, Guarwinum Protonotarium, Marchionem Theodoricum de Susiz, Florentium Comitem Holandiae, Comitem Didonem de Groyz, Comitem Henricum de Diessa, Comitem Robertum de Diuna.
Ad huius autem pacti, promissionis et iuramenti nostri et Principum nostrorum memoriam et inviolabile firmamentum præsens Privilegium nostrorum per manus Guorwini Protonotarii nostri scribi fecimus et Imperiali sigillo nostro aureo sigillatum et prædictorum Principum communitum, vobis suprascripto illustri Regi Willielmo fecimus assignari.
Anno Dominicæ Incarnationis millesimo centesimo septuagesimo septe, mense Augusti, decima Indictione.